Të nderuar !
U njoftoj se ditë më parë doli nga shtypi libri im i titulluar:“ Dasma në Anë të Malit-Ritet dhe ceremoniali i saj “. Libri në fjalë trajton tema nga fusha e etnografisë që ka të bëjnë me shqiptarët në Malin e Zi, përkatësisht në zonën e Anës së Malit.
Struktura e këtij materiali në vete përmban disa nga ritet dhe zakonet e dasmës në Anë të Malit. Ritet dhe ceremoniali i dasmës, si këngët, vallet, veshjet dhe lojërat popullore që e shoqërojnë, janë padyshim një pasuri kombëtare. Të gjitha këto krijojnë një mozaik shpirtëror që u përcoll brez pas brezi dhe ruajtur deri në ditët tona, duke u kultivuar si vlera.
Mendoj se kemi të bëjmë me një material interesant dhe i pa trajtuar në këtë formë, ku autori ofron të dhëna me interes për këtë krahinë të veçantë etnografike e cila dallohet me identitetin e vet kombëtar.
Në këtë përmbledhje jam munduar t’i pasqyroj disa nga ritet dhe zakonet në ceremonialin e dasmës në Anë të Malit, duke ofruar të dhëna të pa publikuar deri më tani, të ilustruar me foto dhe gërshetuar me këngë. Andaj, mendoj se paraqet kontribut të veçantë në fushën e etnografisë shqiptare.
Për gjithë këtë falënderoj anamalasit tanë bujarë, të cilët me dinjitet ruajtën dhe trashëguan gjithë këto vlera, këtë thesar të çmuar që gjithherë na bën të ndjehemi krenarë.
Një falënderim i veçantë shkon në adresë të Shoqatës “ Ana e Malit “në N. Y. Them këtë së pa ndihmën Tuaj, do ta kisha shumë të vështirë botimin e këtij libri.
Përzemërsisht u falënderoj të gjithëve, e në veçanti nismëtarët që me kuptuan dhe vlerësuan.
Faleminderit shumë.
U jam mirënjohës.
Ju vë në dijeni se përurimin e librit e planifikoj në gjysmën e muajit maj të këtij viti.
Por, duke respektuar konsideratën Tuaj, me shtynë që të gjitha librat e mia do t’i shpërndaj falas për dashamirët e fjalës së shkruar.
Respekt për gjithë Ju, për Shoqatën “Ana e Malit”.
U përgëzoj për punën , angazhimin dhe qasjen që jeni duke bërë në avancimin e vlerave kombëtare. Ju lumtë !
Suksese.
Përshëndetje të sinqerta
Esat Mehmeti, Ana e Malit, prill, 2023
